Jahon iqtisodiyoti va diplomatiya universiteti huzuridagi
Diplomatik akademiyaning faoliyati haqida

Oʻzbekiston Respublikasi Prezidentining 2022-yil 23-iyuldagi “Jahon iqtisodiyoti va diplomatiya universiteti faoliyatini tizimli isloh qilish chora-tadbirlari toʻgʻrisida”gi PQ–330-sonli qaroriga asosan 2022-yil sentabr oyidan Jahon iqtisodiyoti va diplomatiya universiteti (JIDU) huzurida Diplomatik akademiya oʻz faoliyatini boshladi.

Davlat rahbari tomonidan belgilab berilgan vazifalardan kelib chiqib, nisbatan qisqa vaqt ichida Diplomatik akademiyaning tashkiliy-meʼyoriy hujjatlari ishlab chiqildi va tasdiqlandi. Jumladan, Dipakademiya shtat jadvali, oʻquv rejalari va oʻquv dasturlari, tinglovchilar tayyorgarligini baholash tizimi qabul qilindi, Ilmiy kengash tarkibi shakllantirildi.

Hozirgi kunda Diplomatik akademiya xodimlari shtati (2022-y. shtat jadvali boʻyicha) 90 foizga yetkazildi. Xodimlar va Dipakademiya oʻrtasida mehnat shartnomalari tuzildi. Boʻlimlar nizomlari ishlab chiqilgan va tasdiqlangan. Dipakademiyaning rasmiy veb-sayti ishga tushirilgan.

2022-yil 1-noyabr kuni Diplomatik akademiyaning ochilish marosimida davlat idoralari vakillari, Oʻzbekistonda akkreditatsiyadan oʻtgan qator xorijiy davlatlar diplomatik vakolatxonalari rahbarlari ishtirok etdilar.

Zahiradagi diplomatlarni tizimli tayyorlash boʻyicha Dipakademiyaning “Oʻzbekiston Respublikasining tashqi siyosiy va tashqi iqtisodiy faoliyati” mavzusidagi birinchi oʻquv kursiga Tashqi ishlar vazirligi, Investitsiyalar va tashqi savdo vazirligi, Mudofaa vazirligi va Oʻzbekiston Respublikasi Oliy Majlisi Qonunchilik palatasi vakillaridan iborat 26 nafar tinglovchi qabul qilindi.

2022-yil 19-noyabrdan 17-dekabrga qadar Oʻzbekiston Respublikasi Prezidenti Administratsiyasi xodimlari uchun “Diplomatik protokol va xalqaro muzokaralar” mavzusida maxsus oʻquv kursi tashkil etildi.

Dipakademiya oʻquv jarayoniga xalqaro munosabatlar sohasida chuqur nazariy bilim va katta amaliy tajribaga ega milliy va xorijiy mutaxassislar jalb etildi.

2022-yil 27-dekabr kuni yuqorida koʻrsatilgan kursni muvaffaqiyatli tamomlagan tinglovchilarga Diplomatik akademiya sertifikatlari topshirildi.