2023-yilning 3-oktabr sanasida Hindiston xalqaro markazida buyuk mutafakkir va qomusiy olim Abu Rayhon Beruniy tavalludining 1050 yilligiga bag‘ishlangan konferensiya bo‘lib o‘tdi.

Mamlakatimizning Dehlidagi elchixonasi, "Hindiston – Markaziy Osiyo" jamg‘armasi va Jahon iqtisodiyoti va diplomatiya universiteti huzuridagi
Diplomatik akademiya hamkorligida tashkil etilgan anjumanda ikki mamlakat yetakchi oliy bilim yurtlari va ilmiy-tadqiqot markazlari vakillari ishtirok etdi.

O‘zbekiston Fanlar akademiyasi, Abu Rayhon Beruniy nomidagi sharqshunoslik instituti, Toshkent davlat sharqshunoslik universiteti, Javaharla'l Neru universiteti, Dehli universiteti, Jamiya Milliya Islamiya universiteti,
Kashmir universiteti yetakchi olimlari va boshqa qator tadqiqotchilar buyuk alloma Abu Rayhon Beruniyning ilmiy faoliyati va jahon ilm-fani rivojidagi o‘rni xususida so‘z yuritdi.

Xalqaro konferensiya ishtirokchilari Abu Rayhon Beruniy ilmiy merosining tarixiy va zamonaviy ahamiyatiga oid mavzularda ma'ruza qildi.

Hindiston qatnashchilari o‘z nutqlarida Beruniyning "Hindiston" asari bugungi kunda ham Hindiston tarixini o‘rganish jarayonida o‘zining noyob manba sifatidagi qadrini yo‘qotgani yo‘q deb ta’kidladilar.

Bo‘lib o‘tgan konferensiya ikki tomonlama tarixiy aloqalarmizni chuqur o‘rganishga va hozirgi zamon munosabatlarimizni mustahkamlashga hissa qo‘shadi.